Rreth 13 mijë persona kanë protestuar në Paris dhe qytete të tjera franceze kundër pasaportës së detyrueshme shëndetësore për hyrjen në shumë ambiente publike. Kjo masë u mor nga qeveria franceze për të luftuar valën e katërt të pandemisë koronavirusit. Kjo është fundjava e tretë me radhë që qytetarët, përmes protestave, po kundërshtojnë masat e reja kundër COVID-19. Protestuesit shprehen se nuk mund ta besojnë që po ndodh një gjë e tillë në vendin e të drejtave të njeriut dhe shumica besojnë se liria e tyre është në rrezik. Qytetarët që duan të vizitojnë muzetë, kinematë apo pishinat, tashmë u ndalohet hyrja nëse ata nuk kanë pasaportë shëndetësore që dëshmon se janë vaksinuar.