Franca së shpejti mund të dërgojë trajnuesit ushtarakë në Ukrainë, pavarësisht shqetësimeve të disa aleatëve dhe kritikave nga Rusia, dhe vendimi mund të publikohet javën e ardhshme gjatë një vizite të presidentit ukrainas në Paris, thanë tre burime diplomatike. Diplomatët thanë se Parisi shpresonte të krijonte dhe të drejtonte një koalicion vendesh që ofrojnë një ndihmë të tillë për përpjekjet e luftës së Kievit, edhe pse disa nga partnerët e tij të Bashkimit Evropian kanë frikë se kjo mund të cojë në një konflikt të drejtpërdrejtë me Rusinë. Franca fillimisht do të dërgojë një numër të kufizuar personeli për të vlerësuar modalitetet e një misioni përpara se të nisë disa qindra trajnues, thanë dy nga diplomatët. Trajnimi do të përqendrohet tek çminimi, mirëmbajtja e pajisjeve operacionale dhe ekspertiza teknike për avionët luftarakë që do të sigurohen nga Perëndimi, thanë ata. Parisi gjithashtu do të financonte, armatoste dhe stërviste një brigadë të motorizuar ukrainase. “Marrëveshja është në fazë të avancuar dhe ne mund të presim diçka javën e ardhshme”, tha një nga burimet. Presidenti ukrainas Volodymyr Zelenskiy do të vizitojë francën më 6 qershor, në 80-vjetorin e Ditës së fitores, kur ushtarët aleatë zbarkuan në Normandi për të dëbuar forcat gjermane naziste gjatë Luftës së Dytë Botërore. Ai do të zhvillojë bisedime me presidentin francez Emmanuel Macron në Paris një ditë më pas. Komandanti i lartë i Ukrainës Oleksandër Syrskyi kishte thënë të hënën se ai kishte nënshkruar dokumentet që lejonin instruktorët ushtarakë francezë të vizitojnë qendrat e trajnimit ukrainas së shpejti. Ministria e Mbrojtjes e Ukrainës, në një "sqarim", tha se Kievi kishte shprehur interes për një projekt që përfshin pranimin e instruktorëve të huaj që nga shkurti. Presidenti rus Vladimir Putin në anën tjetër tha se prania e ushtrisë së rregullt franceze në Ukrainë, është një hap drejt konfliktit global.