Një zjarr i madh, i dalë jashtë kontrollit, po shkrumbon gjithcka që i del përpara në Francën Jugperëndimore dhe ka detyruar evakuimin e 10,000 njerëzve nga disa qytete dhe fshatra të vegjël pranë kufirit me Spanjën dhe zyrtarët thanë të hënën se erërat e forta do t’i përhapin më tej flakët. Zjarri ka djegur rreth 4,600 hektarë tokë në rrëzë të Pirenejve franceze, thanë autoritetet lokale. "Kushtet po përkeqësohen përsëri", paralajmëroi Ministri i Brendshëm francez Laurent Nunez. "Sot beteja rifillon", tha ai. Valët e nxehtësisë në Francë dhe në të gjithë Evropën Perëndimore në maj dhe qershor kanë shkrumbuar zona të gjera toke, duke i bërë ato veçanërisht të ndjeshme ndaj zjarreve këtë vit. Flakët kanë përfshirë tani zonat në trajektoren e fazës së tretë të turit të francës. Autoritetet e kanë mbyllur etapën për publikun për t'u lejuar shërbimeve të emergjencës akses të lehtë në zonë ndërkohë që gara është lejuar të vazhdojë. Në anën spanjolle të kufirit, zjarri shkatërroi 2,200 hektarë tokë por autoritetet katalanase thanë se flakët ishin të qëndrueshme dhe zjarri do të shuhej plotësisht gjatë javës.