Franca është vendi i parë në Bashkimin Evropian që miratoi ndalimin e përdorimit të rrjeteve sociale për minorenët nën moshën 15 vjeç. Pas Senatit francez, edhe Asambleja Kombëtare e miratoi ligjin me një shumicë të madhe votash, 279 pro dhe 81 kundër. Me kërkesë të Presidentit Emmanuel Macron, rregullat e reja pritet të hyjnë në fuqi menjëherë pas pushimeve verore. Pas vendimit të Parlamentit, Macron tha: "Kisha punuar për këtë nismë dhe tani është vendosur: që nga fillimi i vitit të ri shkollor, rrjetet sociale do të jenë të ndaluara për fëmijët nën 15 vjeç.” Operatorët e platformave do të detyrohen të vendosin mekanizma efektivë për verifikimin e moshës së përdoruesve. Sipas Macron, Franca po hap rrugën për një rregullim të mundshëm në të gjithë Evropën. Për llogaritë e reja në rrjetet sociale, ligji do të zbatohet nga 1 shtatori. Për llogaritë ekzistuese do të ketë një periudhë kalimtare prej katër muajsh, deri më 1 janar 2027. Gjatë kësaj kohe, sipas Macronit, do të mbyllen llogaritë ekzistuese të përdoruesve nën 15 vjeç. Ndalimi do të prekë të gjitha platformat sociale, por do të ketë përjashtime për "enciklopeditë online” dhe "projektet digjitale me qëllime edukative”. Ligji parashikon gjithashtu zgjerimin e ndalimit të telefonave celularë në shkolla. Ndërsa më parë ndalimi zbatohej në arsimin fillor dhe të mesëm të ulët, tani ai do të shtrihet edhe në shkollat e mesme të larta. Megjithatë, do të ketë mundësi për përjashtime kur është e nevojshme. Qëllimi i ligjit është të mbrojë të rinjtë nga efektet e dëmshme që rrjetet sociale mund të kenë ndaj shëndetit të tyre.