81-vjeçari Xhemal Meta u vra nga fqinji i tij nën dyshimet se i moshuari i ngacmonte gruan. Kjo është dëshmia e parë e Isuf Hasës, që ka pranuar krimin e rëndë të ndodhur në fshatin Zall Bastar në Tiranë. Ai thotë se shkoi në mëngjes për të pirë kafe me Xhemalin. “Pasi mbaruam kafen, do të shkonim në lokalin e fshatit. Në oborrin e shtëpisë së tij pashë çekiçin dhe e mora e qëllova nga pas. E qëllova pasi kishte shumë kohë që më ofendonte. Kisha kuptuar që më ngacmonte gruan”, vijon dëshmia e 64-vjeçarit, Isuf Hasa. Autori thotë punon si roje nate në Dajt dhe kishte raste kur për netë me radhë nuk shkonte në shtëpi. Gjatë turneve në punë, Isuf Hasa thotë se Xhemali e provokonte dhe ofendonte në telefon. “Xhemali më merrte në telefon dhe më thoshte që si nuk na dhe një herë nga rakia e gruas tënde. Kisha kohë që nuk po e duroja dot”, thotë ai. Autori rrëfen se 200 mijë lekët ja ka marrë pasi e ka vrarë dhe ka qenë vetë viktima që i ka treguar shumën. Më pas, sipas dëshmisë, ai ka udhëtuar me taksi drejt Vorës, ku ka fshehur çekiçin me të cilin goditi për vdekje fqinjin e tij.