Presidenti ukrainas Volodimir Zelenski u takua me Presidentin francez Emmanuel Macron në Bruksel, i cili ka mbështetur diskutimin për idenë e forcave evropiane për Ukrainën. "Ndajmë një vizion të përbashkët: garancitë e besueshme janë thelbësore për një paqe që mund të arrihet vërtet", shkroi Zelenski në rrjetin X pas takimit. “Do të vazhdojmë të punojmë për iniciativën e Presidentit Macron në lidhje me praninë e forcave në Ukrainë, që mund të kontribuojnë në stabilizimin e rrugës drejt paqes”. I pyetur se si do të përgjigjet Britania nëse Presidenti Zelenski do të kërkonte dërgimin e trupave britanike në Ukrainë, ministri i Jashtëm britanik David Lammy tha për Sky Neës se nuk shihte asnjë shenjë se Presidenti rus Vladimir Putin ishte i gatshëm për të negociuar. "Diskutimi ka të bëjë me furnizimin e Ukrainës për ditët në vijim. Kjo është arsyeja pse takohemi në këtë moment shumë të zymtë, për t’u siguruar që Ukraina do ta kalojë dimrin dhe do të hyjë në vitin 2025", tha ai. "Unë e di se ka shumë spekulime, por e vërteta është se Putini nuk është një njeri me të cilin mund të negociosh, kur ai po shkakton një kaos të tillë në tokën evropiane në këtë moment ", shtoi ai. "Është forca ajo ndaj së cilës Vladimir Putini do të reagojë".