Një cisternë nafte ruse thuhet se po hetohet për sabotim të mundshëm pasi një kabllo tjetër nënujore u dëmtua në Detin Baltik. Autoritetet finlandeze po hetojnë anijen Eagle S, pjesë e asaj që quhet "flota hije" e Rusisë, pasi kablloja elektrike nënujore Estlink 2 u këput në ditën e Krishtlindjes. Incidenti ndërpreu lidhjen e energjisë elektrike mes Finlandës dhe Estonisë, në ditën e Krishtlindjes. Me një kapacitet transmetimi mbi 650 megavat, kablloja 170 kilometra e gjatë është një lidhje e rëndësishme e transmetimit të energjisë elektrike për Finlandën dhe Baltikun dhe mund të duhen disa muaj për të riparuar dëmtimin e kabllos që u instalua gati një dekadë më parë. Ky është më i fundit në një seri incidentesh në rajon, në të cilët kabllot nënujore duket se janë dëmtuar. Autoritetet po hetojnë nëse ishte një akt sabotimi nga rusët pasi Eagle S u pa duke kaluar mbi kabllo në momentin e incidentit, raporton Financial Times. Policia thuhet se ka hipur në cisternë në kuadër të hetimit të saj. Disa raporte thonë se Eagle S ngadalësoi ndjeshëm shpejtësinë e saj disa minuta para se të kalonte mbi kabllon Estlink 2.