Ilir Meta përshkallëzoi sulmet ndaj kreut të SPAK, Altin Dumani, që e akuzoi se ka takuar në burgun e Fierit dhe e ka nxitur Kastriot Ismailajn që të dëshmojë kundër tij për dosjen CEZ-DIA dhe se po merret me vjehrrën e tij, duke iu referuar faktit se prokuroria e posaçme ka marrë në pyetje të ëmën e Monika Kryemadhit. Meta nuk e fshehu faktin se mund të përfundojë në burg pas përfundimit të hetimeve. “Po i them dum-Dumanit, tre herë ke përmendur emrin tim që po më heton për CEZ-DIA, me ke çuar edhe njerëz që të iki nga Shqipëria. Nuk jam legen si ty unë. Merresh me vjehrrën time ti. Po pse mo palaço ka frikë Ilir Meta nga burgu yt? Po Meta nga burgu do ta shpërbëjnë celulën kriminale që ke aty? Hajde dil me mua në debat televiziv. Je injorant. Të ka thënë ty amerikanët të më fusësh në burg? Po që tani? Nuk zutë mend vend ju palaço? O palaço, o dum-Duman, torrollak, thirri mendjen, reflekto, thelloju. Nuk është kërcënim, është këshillim që po të jepet. Hape CEZ-DIA me urdhër të Edi Ramës. I ke vajtur 20 herë në burg Ismailajt që të dalësh ti nga burgu dhe të vijë ai këtu...”, tha Meta.