Kreu i Partisë Demokratike Lulzim Basha ka reaguar pasi Kuvendi rrëzoi gjatë seancës së fundit dy amendamentet e tij për sigurinë kombëtare dhe për ndihmën ndaj Kosovës me 50 mln euro ndihmë ushtarake. Sipas tij, shkaktari i kësaj është Rama, për të cilin thotë se flet si perëndimor, por vepron si lindor. Kryedemokrati thotë se aleatët strategjikë e trajtojnë sigurinë e Kosovës si çështje të sigurisë kombëtare, rajonale, dhe europiane duke shtuar se vetëm Rama nuk e konsideron të tillë. Për Bashën, Kosova nuk ka nevojë për leksione demokracie nga një autokrat, por për mbështetje konkrete. Ndërkohë ish- kryeministri Sali Berisha ka reaguar në lidhje me përplasjet në OKB mes kryeminsitrit të Kosovës dhe presidentit serb. Përmes një mesazhi në rrjete sociale, Berisha thekson se kryeministri shqiptar dhe presidenti serb janë dy siamez në censurë. Teksa tha se fjala e Kurtit në Këshillin e Sigurimit nuk u transmetua në të gjithë televizionet serbe, shtoi se edhe në Shqipëri ndodh e njëjta gjë me censurimin mediatik. Kjo ndodh, sipas Berishës, sepse diktatorët kanë tmerr nga fjala e lirë.