Partnerja e Roan Brahimit, 32-vjeçarit shqiptar të ekzekutuar në Athinë mbrëmjen e 9 majit ka folur për mediat greke. Ajo rrëfen se nuk mban mend asgjë nga ekzekutimi i Brahimit. “Isha bashkë me të brenda në makinë, por nuk e mbaj mend si ndodhi. Pastaj dola nga makina”. Ajo më tej shtoi: “Fëmija i pa të gjitha. Tani e ka mamaja ime, unë jetoj në shtëpinë time. Nuk jam fare mirë”. Sipas mediave greke, në momentin që është qëlluar Roan Brahimi, partnerja e tij ka humbur ndjenjat, ndërsa fëmija i tyre ka bërtitur “Babi im, babi im”. Më pas në vendngjarja ka mbërritur gjyshja e fëmijës e cila e ka larguar prej andej. Ajo thotë se nuk është në dijeni të aktivitetit të Roanit, ndërsa deklaron se ai kishte shkuar në Athinë të shtunën, një ditë para Pashkës ortodokse. “Nuk dija asgjë, nuk më kishte thënë gjë. Erdhi të Shtunën e Madhe për Pashkë”. Autoritetet greke dyshojnë se Roan Brahimi është ekzekutuar nga dy persona. Vrasja e tij ka qenë e mirëorganizuar, aq sa autorët i kanë rezervuar edhe vendin e parkimit, ku u ekzekutua në sy të fëmijës 7 vjeç.