Nikollë Radaci, 57-vjeçari që përplasi për vdekje dy të miturit në zonën e ish Kënetës në Durrës dhe plagosi një tjetër, ka pretenduar në Gjykatë se një automjet i ka prerë rrugën në momentin kur ka ndodhur aksidenti i rëndë. Para togave të zeza, ai ka deklaruar se kishte dalë nga shtëpia për të marrë një vegël pune tek një miku I tij, por ndërsa ecte në rrugë, nga një rrugicë lagjeje i kishte dalë papritur një automjet dhe se për rrjedhojë ka devijuar për të shmangur përplasjen. Radaci ështe shprehur më tej, se nga korsia e djathtë ku po ecte, ka përfunduar sipër trotuarit të anës së majtë të rrugës, ku ishin fëmijët. “Pasi hipa mbi trotuar, jam përfshirë në aksident me disa fëmijë që ndodheshin mbi trotuar. Automjeti që unë po drejtoja nuk ka arritur të ndalojë dhe kam shkuar disa metra më përpara”, ka treguar 57-vjeçari.