Rreth 6 milionë euro është vlera e qymyrit të përpunuar që bizneset në Kosovë kanë importuar në dy vjetët e fundit nga shtetet fqinje dhe të tjera, tregojnë të dhënat e Doganave të Kosovës. Importi ka arritur këtë vlerë me gjithë faktin se Kosova zë vendin e pestë në botë për sa i takon rezervave të qymyrit. Por, problemi duket se qëndron te fakti se “Kosova Thëngjilli” - kompania e vetme e licencuar për shitjen e qymyrit të përpunuar në Kosovë - nuk e ka vazhdimisht këtë lëndë, ndërsa kërkesat për të janë në rritje prej kohësh. “Kosova Thëngjilli” është një shoqëri aksionere, e krijuar në vitin 2013, në kuadër të Korporatës Energjetike të Kosovës - KEK. Kontrata mes KEK-ut dhe saj, përditësohet çdo tre vjet. Afati i kontratës aktuale pritet të skadojë muajin e ardhshëm, por nga Korporata energjetike e kosovës, nuk tregojnë nëse ajo do të vazhdohet ose jo. Qymyri i përpunuar përdoret për disa qëllime, përfshirë edhe ngrohjen, edhe pse ndikon në ndotjen e ajrit kur digjet. Kërkesat për këtë produkt janë rritur këto kohë për shkak të krizës energjetike që ka përfshirë Evropën. Qeveria e Kosovës ka paralajmëruar, po ashtu, mungesa të energjisë elektrike gjatë dimrit dhe u ka bërë thirrje qytetarëve që të gjejnë alternativa për ngrohje.