Presidenti Donald Trump njoftoi se do të zhvillojë një bisedë telefonike me homologun e tij rus, Vladimir Putin. Duke folur nga bordi i ‘Air Force One’, shefi i Shtëpisë së Bardhë tha se telefonata do të zhvillohej ditën e martë. “Ne duam të shohim nëse mund t’i japim fund kësaj lufte”, u tha ai gazetarëve. Administrata e Trump është përfshirë në bisedime me Rusinë për të bindur Moskën që të nënshkruajë një armëpushim 30-ditor, për të cilin Ukraina tashmë ka rënë dakord. Është një mision i ndërlikuar, ka thënë më herët Vladimir Putin. Presidenti rus parimisht është pro marrëveshjes, por ka vendosur disa kushte paraprake, njëri prej tyre që armëpushimi të çojë në një paqe afatgjatë.