Flamuri blu e verdhë i Ukrainës valëvitet mbi një dyqan të shkatërruar dhe ushtarë rusë shihen të vdekur në rrugët e fshatit Neskuchne, ku kanë mundur të hyjnë gazetarët e agjencisë ndërkombëtare të lajmeve reuters, të martën...në të parin konfirmim të pavarur të avancimit ukrainas në fushëbetejë. As edhe një banor i vetëm nuk mund të gjendet në Neskuchne, një prej pak fshatrave në lumin Mokry Yali që ukraina tha se ka rimarrë nën kontroll. Trupat ukrainase shihen tani të enden rrugëve plot baltë mbi tanke apo mjete të tjera. Një avion fluturon në qiell. “Tre ditë më parë, forcat ruse ishin ende këtu. Ne i dëbuam nga Neskutchne, Lavdi Ukrainës”, thotë Artem, një pjesëtar i njësisë ukrainase të mbrojtjes së territorit. Ndërtesat kryesisht një apo dy katëshe të fshatit, që më parë kishte një popullatë prej disa qindra banorësh, janë shkatërruar thuajse të gjitha. Vendi përreth është i heshtur, përvec ndonjë gjëmimi artilerie që dëgjohet në distancë. Reuters thotë se gazetarët e saj panë të paktën tre trupa ushtarësh rusë të vrarë në rrugë.