Kryeministri Edi Rama ka reaguar në rrjetet sociale sërish për protestën, ndërsa ka përsëritur ftesën për dialog. Në një postim të gjatë, kreu I qeverisë e nis reagimin me një fjalë të moçme ku shkruan se rruga për në ferr është e shtruar me qëllime të mira. E pikërisht me këtë shprehje që ka mbijetuar ndër shekuj, Rama bën një krahasim me situatën aktuale, ku sipas tij, protesta po shfrytëzohen nga ato që ai I quan “sorra” e “korba”. Sepse problemi nuk janë flamingot. Qëllimi i tyre është i mirë. Problemi është se flamingot nuk pranojnë të dëgjojnë faktet, të diskutojnë zgjidhjet dhe të bashkërendojnë forcat me institucionet dhe me burimet serioze të ekspertizës, për të mbrojtur gjithçka duhet duke realizuar projektin e duhur. Kësisoj ata bëhen vegla e sorrave dhe korbave që i kanë rrethuar. Unë i kam dëgjuar flamingot dhe i kuptoj ata. E respektoj pa paragjykim shqetësimin e tyre, pikërisht sepse ka qenë gjithnjë edhe i imi. Ajo që nuk arrij të kuptoj është pse flamingot nuk duan të ndahen nga sorrat që ushqehen me zhurmën, me shpifjen, me teoritë konspirative dhe korbat që me bullizmin e me refuzimin kategorik të çdo fakti, kërkojnë të marrin peng Shqipërinë?! Kryeministri Rama shpreh mirëkuptim për qytetarët që janë mobilizuar në protestë nga shqetësimi për mbrojtjen e natyrës, të cilët i simbolizon me “flamingot rozë”. Por jo për grupimet e tjera të cilat sipas tij po e ushqejnë tubimin me teori konsiprative.