Një zjarr i përmasave të konsiderueshme ka përfshirë kurorën e gjelbër të Sarandës, në zonën e mbjellë me pisha pranë Manastirit të 40 Shenjtorëve. Flakët janë përhapur me shpejtësi në sipërfaqen me bimësi, duke u afruar rrezikshëm me banesat dhe disa hotele që ndodhen në zonën përreth. Terreni i vështirë ka penguar ndërhyrjen e mjeteve zjarrfikëse në disa pika, ndaj është kërkuar edhe ndërhyrje nga ajri. Në mbështetje të Bashkisë Sarandë është nisur helikopteri Cougar, ndërsa në operacion janë angazhuar edhe forcat zjarrfikëse të Delvinës dhe Konispolit. Për momentin, forcat në terren po punojnë për të frenuar përhapjen e flakëve dhe për të shmangur afrimin e zjarrit me zonat e banuara. Situata mbetet nën monitorim, ndërsa ndërhyrja nga ajri konsiderohet e nevojshme për shkak të terrenit të vështirë për tu aksesuar me mjete tokësore.