Dy vatra zjarri që kanë shpërthyer pasditen e së hënës në Ballsh dhe Finiq u përhapën me shpejtësi duku shkrumbuar të paktën dy banesa dhe kërcënuar dhjetëra të tjera. Në Ballsh flakët shpërthyen në fshatin Kash, fillimisht në një zonë me bimësi të egër dhe shkurre dhe më pas edhe tek të mbjellat dhe oborret e dy banesave. Ndërhyrja e zjarrfikëses vetëm nga toka nuk vendosi dot nën kontroll flakët, që dogjën dy banesa, teksa u kërkua ndërhyrja nga ajri. Në Bashkinë e Finiqit flakët përfshinë fshatrat Mesopotam, Kostar dhe Vllahat. Zjarri ka rënë fillimisht zonën kodrinore të Matomares dhe i favorizuar nga era ka zbritur në zonat e banuara. Në fshatin Kostar flakët hynë në oborret e banesave. Tre helikopterë u angazhuan për shuarjen e flakëve, 2 Cougar dhe 1 Blackhaëk. Nën kërcënim ishte edhe fshati Vllahat, ku forcat zjarrfikëse u stacionuan pranë shtëpive. Ndërkohë, në Librazhd prej 6 ditësh, një zjarr i përmasave të mëdha vijon të djegë një pjesë të zonës pyjore të fshatit Dardhë, ndërsa përpjekjet për vënien nën kontroll të flakëve po përballen me vështirësi të mëdha për shkak të terrenit malor, erës së fortë dhe temperaturave të larta. Ndërkohë, një vatër e fuqishme zjarri është regjistruar paraditen e kësaj të hëne në periferi të qytetit të Cërrikut, duke shkaktuar djegien e një sipërfaqeje me ferra, shkurre dhe një parcele me ullinj. Edhe në fshatin Vanaj të Libofshës shpërtheu një vatër zjarri, që dogji shkurre e pemëtore, por pa kërcënuar sëriozisht banesa.