Një zjarr përfshiu një kompleks tregtar pranë kryeqytetit të Iranit, Teheran, duke vrarë të paktën tetë persona dhe duke lënë dhjetëra të tjerë të plagosur, raportoi media shtetërore të mërkurën. Flakët shpërthyen të martën në kompleksin tregtar Arghavan në qytetin Andisheh, në perëndim të Teheranit. Pamjet e transmetuara nga televizioni shtetëror treguan një ndërtesë shumëkatëshe në flakë me tym të zi të dendur që ngrihej në qiell. Sipas televizionit shtetëror iranian, zjarri plagosi 41 persona. Kompleksi kishte më shumë se 250 njësi tregtare dhe 50 njësi zyrash, sipas zyrtarëve lokalë. Zyra e Prokurorit Publik kërkoi një hetim për incidentin, për të identifikuar fajtorët e mundshëm. Ajo gjithashtu lëshoi një urdhër arresti për ndërtuesin e ndërtesës. Zjarret janë të zakonshme në Iran, por ato rrallë shkaktojnë viktima. Në qershor 2020, një shpërthim i fuqishëm i shkaktuar nga bombola gazi që morën flakë në një klinikë në Teheranin verior vrau të paktën 19 persona. Në janar të vitit 2017, një zjarr në qendrën tregtare 15-katëshe Plasco në Teheran vrau të paktën 22 persona, përfshirë 16 zjarrfikës.