116 vite pas Kongresit të Manastirit u prezantua draft fjalori i madh i gjuhës shqipe, i cili vjen në vazhdën e misionit të të parëve për të ruajtur identitetin dhe forcimin e gjuhës amëtare. Ky fjalor mishëron rrugëtimin e gjatë dhe thesarin shprehimor të gjuhës shqipe, dhe simbolikisht u publikua në ditën e alfabetit shqip. Gjinushi: “Për të hartuar këtë vepër u ftuan tërë specialistët e fushës në trojet shqiptare e Arbëri, përgjigjja e gatishmëria e tyre, si dhe e qeverisë dhe Kryeministrit për të na besuar e financuar këtë projekt madhor, mundësoi fillimin e punës e kryerjen me kompetencë e në kohën e duhur të kësaj vepre madhore. Për hartimin e saj u ngrit një grup i përbërë nga 25 hartues, 55 bashkautorë të drejtuar nga një redaksi prej 10 leksikografësh e në ndihmë të saj u krijua një qendër e posaçme, ajo e Botimeve Enciklopedike dhe Albanologjike, tashmë e kthyer në qendër të përhershme.”