Pasi e udhëhoqi NATO-n për një dekadë, Jens Stoltenberg i paralajmëroi vendet anëtare të NATO-s të jenë të bashkuara. Në fjalën e lamtumirës së tij, ai tha se ato duhet patjetër “të jenë të gatshme ta paguajnë çmimin për paqe” përballë një Rusie të guximshme. “Ne duhet të jemi të gatshëm ta paguajmë çmimin për paqe. Më shumë të holla, mbrojtje më të forta, sa më efikase mbrojtja jonë, aq më e madhe siguria jonë”, tha ai. 65-vjeçari kërkoi nga vendet anëtare të mos “i këmbejnë interesat ekonomike afatshkurtër për nevojat afatgjate të sigurisë” ndërsa theksoi se çdo marrëveshje e ardhshme për paqe midis Ukrainës dhe Rusisë duhet të mbështetet nga një përkrahje e fortë dhe e qëndrueshme ushtarake, dhe jo thjesht nga letrat. Stoltenberg, ish-kryeministër i Norvegjisë, do të kthehet në atdhe për t'u bërë guvernator i Bankës Qendrore, ndërsa do t'ia dorëzojë detyrën ish-kryeministrit holandez, Mark Rutte, më 1 tetor. Në muajt e tij të fundit në detyrë, Stoltenberg është përpjekur t’i bashkojë anëtarët e NATO-s, pasi Hungaria ka paraqitur pengesa për mbështetjen e aleancës për Ukrainën, ndërsa kryeministri Viktor Orban ka thënë se nuk do të ofrojë fonde apo pajisje ushtarake për ta ndihmuar Kievin.