Në Dhomat e Specializuara në Hagë, katër ish-drejtuesit e Ushtrisë Çlirimtare të Kosovës do të japin deklarimet e tyre përfundimtare para trupit gjykues. Hashim Thaçi, Kadri Veseli, Rexhep Selimi dhe Jakup Krasniqi do të kenë nga 20 minuta kohë secili për t’iu drejtuar gjykatës. Fillimisht, pala mbrojtëse ka kërkuar 20 minuta kohë për parashtrimet përmbyllëse, ndërsa më pas ekipet mbrojtëse do t’i drejtohen trupit gjykues për rreth 30 minuta të tjera. Në përfundim të këtyre deklarimeve, trupi gjykues do të ketë në dispozicion tre muaj për të marrë vendimin final, me mundësi shtyrjeje për shkak të volumit të madh të dosjes. Në sallë pritet të jenë të pranishëm një numër i madh familjarësh e qytetarësh në galerinë publike. Në këtë seancë do të marrë pjesë edhe zëvendëskryeministri i Kosovës, Glauk Konjufca. Deklarimet përmbyllëse kanë nisur më 9 shkurt. Procesi gjyqësor ndaj ish krerëve të UÇK-së ka filluar më 3 prill 2023, gati tre vjet pas konfirmimit të aktakuzës, ndërsa të akuzuarit mbahen në qendrën e paraburgimit në Hagë që prej asaj kohe.