Kryetari i Partisë Demokratike Lulzim Basha deklaroi gjatë një interviste se largimi i ish-kryeministri Sali Berisha nga fushata elektorale për kreun e Bashkisë së Tiranës në vitin 2011, ishte çelësi i fitores ndaj Edi Ramës. Por, duket se kjo është një gënjeshtër nga ana e kryedemokratit. Pamjet e vitit 2011, që i gjen lehtësisht në you tube, tregojnë krejt të kundërtën. Në mitingun përmbyllës në kryeqytet, Basha shfaqet krah për krah me Berishën në podium, teksa nuk mungojnë as përqafimet me një ri-tjetrin. Në lidhje me këtë deklaratë të kreut të PD-së Lulzim Basha ka reaguar dhe ish-presidenti Bujar Nishani. Në një postim në rrjetet sociale, Nishani shkruan se si drejtues i shtabit elektoral për Tiranën, e bezdiste deri në nervozizëm tek shikonte se si gjatë gjithë ditës, Lulzim Basha i kërkonte Sali Berishës ta udhëzonte, t’i tregonte e t’i mësonte edhe detajet më elementare për axhendën ditore dhe tezat e fushatës.