Gjykata Administrative e Apelit rikthen sërish në garë për Gjykatën Kushtetuese gjyqtaren Zhaklina Peto. Vendimi u mor këtë të hënë, teksa padia ishte depozituar më 3 dhjetor. Peto fiton për të dytën herë të drejtën për të vijuar garën për Kushtetuese nga Apeli Administrativ. Këshilli i Emërimeve në Drejtësi e skualifikoi për mos plotësim kriteresh, ndërsa tashmë duhet ta verifikojë për të tretën herë. Ky rikthim në garë i Petos, komplikon më shumë procedurat me kandidatët për anëtarë të Gjykatës Kushtetuese. Sipas procedurës, duhet të mblidhet sërish Këshilli i Emërimeve në Drejtësi, që të shqyrtojë vendimin e Apelit Administrativ për Peton. Kandidatët që janë në garë për këto vakanca është Sonila Bejtja, një emër mjaft i përfolur për qendrimet e saj politike, si dhe Altin Binaj. Zhaklina Peto ka përfunduar studimet në Fakultetin e Drejtësisë në vitin 1995 dhe zotëron titullin Master në Shkencat Civile. Ajo është pedagoge pranë Fakultetit të Drejtësisë prej vitit 1996 si dhe autore e disa librave në fushën e së drejtës.