Shpërblimi financiar nga një marrëveshje e re për mineralet mes Ukrainës dhe SHBA-së ka të ngjarë të vijë pas një dekade ose më shumë, pasi investitorët përballen me shumë pengesa për të vënë në prodhim miniera të reja në vendin e shkatërruar nga lufta. Zhvillimi i minierave që nxjerrin minerale strategjikisht të rëndësishme në vendet me sektorë të vendosur të minierave si Kanadaja dhe Australia mund të zgjasë nga 10 deri në 20 vjet, thanë konsulentët e minierave të enjten. Por shumica e depozitave minerale në Ukrainë kanë të dhëna të pakta për të konfirmuar se janë ekonomikisht të qëndrueshme. Investitorët gjithashtu mund të hezitojnë të kanalizojnë paratë në një vend ku infrastruktura si energjia dhe transporti është shkatërruar nga pushtimi tre-vjeçar i Rusisë dhe siguria e ardhshme nuk është e garantuar. "Nëse dikush mendon se papritmas të gjitha këto minerale do të fluturojnë nga Ukraina, ai po ëndërron", thotë Adam Ëebb, ekspert i fushës. "Realiteti është se do të jetë e vështirë për njerëzit të justifikojnë investimin e parave atje kur ka mundësi për të investuar në minerale kritike në vendet që nuk janë në luftë", shton ai. Ndërsa përfitimet financiare nga marrëveshja janë të pasigurta, zyrtarët në Ukrainë e përshëndetën marrëveshjen si një përparim politik: Ata besojnë se kjo do të ndihmojë në forcimin e mbështetjes amerikane për Kievin, e cila ka rënë nën Presidentin Donald Trump. Ukraina ka nevojë për mbështetjen e SHBA-së - veçanërisht për armë dhe para - për t'i bërë ballë pushtimit ushtarak të Rusisë. Në anën tjetër, Trump e promovoi fuqishëm marrëveshjen, veçanërisht aksesin që ajo ofron në depozitat e elementëve të rrallë të tokës në Ukrainë, të cilët përdoren në gjithçka, nga telefonat celularë te makinat, duke inkurajuar kështu investimet. SHBA nuk prodhon sasi të konsiderueshme të elementëve të rrallë të tokës dhe ka intensifikuar një luftë tregtare me Kinën, furnizuesin kryesor në botë.