Deputetët e Parlamentit të Kosovës, kanë dështuar për herë të tetë të konstituojnë Kuvendin këtë e martë (29 prilll 2025), të dalë nga zgjedhjet e 9 shkurtit. Kandidatja e LVV-së për kryetare të Kuvendit, Albulena Haxhiu, nuk ka arritur të marrë votat e nevojshme, duke marrë vetëm 54 vota pro, 44 kundër dhe 3 abstenime. Në seancat paraprake, për të kishin votuar 57 deputetë - por kësaj radhe disa deputetë të LVV-së munguan. Seanca e radhës konstituive do të vazhdojë të enjten, në ora 10:00. Seanca konstituive ka nisur më 15 prill dhe në shtatë seancat paraprake deputetët kanë arritur të kalojnë vetëm dy pikat e para të rendit të ditës – miratimin e raportit të Komisionit të përkohshëm për verifikimin e mandateve dhe betimin e deputetëve – por, kanë ngecur në pikën e tretë, atë të zgjedhjes së kreut të ri të organit legjislativ. Partia Demokratike e Kosovës dhe Aleanca për Ardhmërinë e Kosovës e kanë cilësuar Haxhiun si figurë përçarëse, ndërkaq Lidhja Demokratike e Kosovës ka thënë se nuk do të japë votë për çdo emër të propozuar nga LVV-ja.