Emisioni investigativ fiks fare edhe këtë të mërkurë ka denoncuar parregullsitë dhe abuzimet që ndodhin gjatë procesit të mbledhjes së firmave nga ish lideri i PD-së Sali Berisha për të thirrur Kuvendin më 11 dhjetor. Fiks Fare tregoi me zë dhe figurë firmosjen nga gazetarët e tij të dy formularëve me identitet fals në 'Foltoren' e mbajtur në Fushë Krujë. Askush nuk u kërkoi një dokument identifikimi apo anëtarësimi, thjesht u dhanë formularët për plotësimdhe firmë. E gjitha ndodhi vetëm pak minuta se vetë i Berisha të paraqitej në 'Foltoren" e radhës në Fushë Kruj, e cila u mbajt të martën. Gjatë pritjes së mbërritjes së Berishës, gazetarët e emisionit Fiks fare i kërkuan një anëtari të PD-së formularë për t'i plotësuar dhe firmosur. Pa nguruar ai u solli dy formularë pa i pyetur as nëse ishin delegat apo anëtar të PD-së. Gazetarët e Fiksit moren formularët dhe pa asnjë pengesë në një ambient pak më të qetë i plotësojnë duke përdorur gjeneralitete false. Pas plotësimit, formularët ia dorëzojnë të njëjtit person, anëtarit të PD-së. Menjëherë pas firmosjes mbërrin edhe Berisha. Në ndryshim nga firmojsa e formularit në Sarandë, askush nuk filmoi nga anëtarët e pranishëm apo organizatorët për të dokumentuar firmosjen e formularëve dhe me video.