Finlanda ka përuruar të hënën një gardh prej rreth 200 kilometrash përgjatë kufirit me Rusinë, në një kohë kur marrëdhëniet mes dy vendeve vijojnë të mbeten të tensionuara. Helsinki e mbylli kufirin me Rusinë në dhjetor të vitit 2023, pasi mbi 1,300 emigrantë pa viza mbërritën në kufirin finlandez. Ministrja e Brendshme e Finlandës, Marie Rantanen, tha se situata aktualisht është e qetë, por mbetet e tensionuar dhe se vendi duhet të jetë i përgatitur për ndryshime të mundshme. “Sot, situata është e qetë, por e tensionuar dhe nuk e dimë vërtet se çfarë na pret nesër. Megjithatë, gjërat mund të ndryshojnë shumë shpejt, kështu që duhet të jemi plotësisht të përgatitur”, deklaroi Rantanen. Në vitin 2023, Finlanda akuzoi Rusinë se po zhvillonte një “luftë hibride”, duke lehtësuar mbërritjen e shtetasve të vendeve të treta drejt kufirit finlandez. Kremlini i hodhi poshtë këto akuza. Sipas ministres Rantanen, gardhi është pjesë e sistemit të sigurisë kufitare dhe do të ndihmojë në mbikëqyrjen e zonës, ndërsa në rast nevoje do të mundësojë edhe parandalimin e hyrjeve të paligjshme në territorin finlandez. Ndërtimi i gardhit vjen edhe në kuadër të ndryshimit të politikës së sigurisë së Finlandës, e cila në vitin 2023 i dha fund dekadave të neutralitetit ushtarak duke u bërë anëtare e NATO-s.