Një anije e lidhur me Rusinë është ndaluar nga autoritetet në Finlandë pasi një kabllo tjetër nënujore u dëmtua në Detin Baltik. Autoritetet finlandeze po hetojnë anijen Eagle S nga "flota hije" ruse pasi kablloja elektrike nënujore Estlink 2 u shkëput në ditën e Krishtlindjes. Policia finlandeze tha se u ngjit në cisternë gjatë natës dhe po heton një rast të "sabotimit të rëndë". Me një kapacitet transmetimi mbi 650 megavat, kablloja 170 kilometra e gjatë është një lidhje e rëndësishme e transmetimit të energjisë elektrike për Finlandën dhe Baltikun. Dhe mund të duhen disa muaj për të riparuar dëmtimin e kabllos që u instalua gati një dekadë më parë, sipas raporteve. Ky është më i fundit në një seri incidentesh në zonë, në të cilët janë dëmtuar kabllo nënujore. Autoritetet po hetojnë nëse rasti i shënuar ditën e krishtlindjes ishte një akt sabotazhi nga rusët pasi Eagle S u pa duke kaluar mbi kabllo në kohën e incidentit, raporton Financial Times. Eagle S është një anije me flamur të Ishujve Kuk, por zyrtarët finlandezë besojnë se ajo është pjesë e flotës ruse të cisternave të naftës. Raportet thonë se anija e ngadalësoi shpejtësinë disa minuta para se të kalonte mbi Estlink 2. Ndërkohë, cisterna e regjistruar në Hong Kong, Xin Xin Tian 2 thuhet se kaloi mbi kabllo po ashtu rreth kohës kur ndodhi dëmtimi i Estlink 2. Ajo është në pronësi të një kompanie logjistike që ka lidhje të ngushta me Rusinë.