22 Nëntori, që prej një viti festë zyrtare, shënon Ditën e Alfabetit të Gjuhës Shqipe dhe kujton një nga momentet më unifikuese në historinë kombëtare, Kongresin e Manastirit të vitit 1908. Në manastir u mblodhën 50 delegatë nga 26 qytete, klube dhe shoqata shqiptare, për të vendosur mbi standardizimin e alfabetit të gjuhës shqipe. Në këtë kongres morën pjesë intelektualë nga të gjitha trojet shqiptare. Kryetar u zgjodh Mit’hat Frashëri, ndërsa nënkryetarë u caktuan Luigj Gurakuqi dhe Gjergji Qiriazi. Ndër pjesëmarrësit ishte edhe Parashqevi Qiriazi, gruaja e vetme në kongres, e cila mbetet figurë e rëndësishme në arsimin dhe kulturën shqiptare. Vendimi historik i Kongresit ishte miratimi i alfabetit latin, të përshtatur për nevojat e gjuhës shqipe, duke vendosur kështu bazën e unifikimit të saj. Kryeministri Edi Rama ka uruar qytetarët me rastin e kësaj dite, duke theksuar domethënien e alfabetit për gjuhën dhe identitetin mbarëkombëtar.