Anketa mujore e Bankës së Shqipërisë tregoi rënie të besimit në ekonomi, si te bizneset, ashtu edhe te konsumatorët. Sipas Bankës së Shqipërisë, në muajin dhjetor treguesi i ndjesisë ekonomike shënoi në total një rënie prej 0.4 pikësh, duke reflektuar përkeqësimin e pritjeve në disa sektorë kryesorë të ekonomisë. Në sektorin e shërbimeve, treguesi i besimit ra me 2.8 pikë përqindje në dhjetor, ndikuar nga vlerësime më pak optimiste për ecurinë aktuale të aktivitetit dhe për nivelin e kërkesës në të ardhmen. Pritjet për punësimin u ulën, ndërsa pritjet për çmimet në të ardhmen u rritën. Tek bizneset e industrisë, besimi ra lehtë me 0.2 pikë përqindjeje, i ndikuar nga pritjet më të ulëta për porositë nga eksportet. Për tregtarët nuk kishte ndryshim, ndonëse presin kërkesë më të ulët. As treguesi i besimit konsumator nuk ndryshoi por ata shfaqen më pak optimistë për situatën financiare dhe për blerje të mëdha. Sektori më optimist mbeti ndërtimi, me një rritje prej 4.5 pikë për qindjeje. Sipas Bankës së Shqipërisë, rritje u mbështet falë përmirësimit të vlerësimeve, rritjes së porosive dhe pritshmërisë për rritje të çmimeve.