Izraeli ka kryer dhjetëra sulme ajrore mbi Rripin e Gazas të hënën pasi militantët palestinezë lëshuan një breshëri raketash në qytetet jugore të Izraelit. Sulmet në agim mbi gaza, ishin disa prej më të rëndëve të parë që kur luftimet nisën një javë më parë. Izraeli tha se ai kishte goditur shënjestra që i përkisnin grupit militant hamas dhe disa shtëpi të komandantëve të grupit, por edhe rrugë kryesore dhe linja të energjisë elektrike janë dëmtuar po ashtu. Ndërkohë, apelet ndërkombëtare për një armëpushim vazhdojnë të rriten. Këshilli i Sigurimit i Kombeve të Bashkuara mbajti një takim të dielën dhe sekretari i përgjithshëm Antonio Guterres paralajmëroi se intensifikimi i luftimeve ka potencialin të shkaktojë një krizë humanitare dhe sigurie, të pakontrollueshme. Ai bëri apel për fundin e menjëhershëm të dhunës shokuese. Por, ndërkohë nuk ka asnjë sinjal që të flasë për ndaljen e dhunës në një kohë kur konflikti hyn në javën e tij të dytë.