Një ferr flakësh ka përfshirë një depo nafte në rusi pasi ajo u godit nga një sulm me dronë kamikazë ukrainas. Pamjet e transmetuara në media dhe rrjetet sociale, tregojnë flakët gjigande që ngrihen në qiell dhe tymin e zi që del nga rafineria e naftës Proletarsk, gjatë natës. Flakët arrinin për disa metra lart në qiell ndërsa zjarri mund të shihej nga kilometra larg. E kjo është një goditje tjetër për makinën e luftës së Vladimir Putinit i cili po përballet po ashtu edhe me pushtimin më në veri, në Kursk. Ukraina e shkatërroi objektin 200 km thellë në rusinë jugore, me një seri sulmesh me dron kamikaze. Bombat fluturuese shpërthyen pas përplasjes dhe bënë që karburanti të digjej. Qëllimi i sulmit nga të paktën pesë mjete ajrore pa pilot në objektin në Rostov ishte dëmtimi i furnizimeve për ushtrinë ruse. Ushtria ukrainase mori përsipër sulmin dhe tha se "masat për të minuar potencialin ushtarak dhe ekonomik" të Rusisë vazhdojnë. Ajo tha se nafta dhe produktet e naftës që prodhoheshin atje përdoreshin nga forcat ruse që luftojnë në ukrainë. Autoritetet ruse deklaruan ndërkohë se kishin penguar sulmin dhe se zjarri ishte shkaktuar nga rënia e mbetjeve të një droni. Guvernatori Vasily Golubev tha: "Një sulm me dron u zmbraps në juglindje të rajonit të Rostovit. Fragmentet e dronit, që ranë në tokë, shkaktuan një zjarr në një magazinë industriale ku ruhej karburant në Proletarka”. Kievi ndërkohë publikoi edhe pamjet e një sulmi masiv me raketa që shkaktoi shkatërrimin e një ure përtej lumit Seym, në rajonin e Kurskut. Sulmi kërcënoi të ndërpresë dërgimin e përforcimeve ruse në zonën ku po vazhdon inkursioni. Por, imazhet satelitore treguan se rusia kishte ndërtuar një urë të përkohshme më poshtë lumit, pas goditjes.