Një zjarr masiv shpërtheu në një njësi prodhimi të karburantit për avionë në rafinerinë e Chevron, në El Segundo pranë Los Angeles, duke shkaktuar flakë të mëdha dhe tym që ngrihej në qiell nga një nga rafineritë më të mëdha në Bregun Perëndimor të SHBA-së. Nuk u raportuan të lënduar dhe të gjithë punëtorët në rafineri janë gjetur, tha një zëdhënëse e Chevron. Nuk ishte menjëherë e qartë se çfarë e shkaktoi shpërthimin e zjarrit në objektin në periferi të El Segundos, i cili furnizon me karburant për avionë Aeroportin Ndërkombëtar të Los Angelesit. Mediat lokale thanë se zjarri në rafineri ishte vënë nën kontroll në orët e para të mëngjesit të së premtes. Nuk është e qartë se çfarë efekti do të ketë zjarri në aftësinë e rafinerisë për të prodhuar karburant për avionë por kryebashkiakia e los angelesit, Karen Bass tha se për momentin ngjarja nuk kishte ndikim në aeroport.