Ka nisur në orët e para të agimit protesta e re e bujqve në Bruksel. Qindra traktorë, të ardhur në qytet gjatë natës, kanë bllokuar disa rrugë në qytet, vecanërisht ato përreth zyrave të BE-së ku mbahet të hënën edhe një takim i ministrave të bujqësisë të 27 vendeve anëtare. Bujqit e ardhur nga disa vende të Evropës për të protestuar kundër politikës bujqësore të përbashkët, kanë bllokuar edhe rrugën që con drejt ndërtesës Evropa ku edhe do mbahet takimi i ministrave. Fermerët i kanë vënë zjarrin gomave në Bruksel ndërsa protestojnë duke kërkuar veprim nga BE për një seri cështjesh, nga cmimet më të ulëta në supermarjete deri tek marrëveshje të tregtisë së lirë. Policia e ndërhyrjes së shpejtë përdori ujin me presion për të shuar zjarret. Më shumë se 100 traktorë u parkuan përreth zyrave të institucioneve të BE-së, duke bllokuar pjesë të brukselit, shumë afër zonës së rrethuar nga policia ku ministrat po takohen. Fermerët në të gjithë evropën protestojnë në fakt prej javësh dhe si reagim, BE ka zbutur disa pjesë të politikave të saj ambjentaliste. BE ka tërhequr edhe një ligj për reduktimin e pesticideve dhe ka shtyrë edhe objektivin për të lënë një pjesë tokë të papunuar për të përmirësuar biodiversitetin. Fermerët kërkojnë edhe dhënien fund të marrëveshjeve të tregtisë së lirë që ata thonë se ka cuar në importe më të lira nga vendet ku prodhuesit përballen me standarte më pak shtrënguese se ato në BE.