Zjarri masiv që përfshiu pallatin 12-katësh pranë QSUT-së dyshohet të jetë shkaktuar nga pakujdesia e disa të miturve. Sipas burimeve hetimore, kamerat e sigurisë kanë filmuar pesë të mitur në pjesën e pasme të një marketi, aty ku nisën flakët. Dy prej tyre shihen teksa largohen duke mbajtur një objekt, që dyshohet të ketë qenë letër, të cilën e hedhin mbi disa kuti kartoni dhe largohen menjëherë. Pak minuta më vonë në vendin ku u hodh letra shfaqet tym, i cili përhapet me shpejtësi në flakë, duke përfshirë fasadën e pallatit dhe duke shkaktuar dëme të mëdha materiale. Për ngjarjen janë vënë nën hetim disa persona, ndërsa janë arrestuar menaxherja e marketit, administratori i pallatit, inxhinieri dhe administratori i firmës së fasadës. Hetimet vijojnë për të zbardhur plotësisht personat përgjegjës.