Policia e Kosovës në bashkëpunim me FBI-në amerikane dhe autoritetet shqiptare SPAK, Policinë e Shtetit dhe Drejtorinë e Hetimit të Krimeve Kibernetike, kanë finalizuar dy operacione të ndryshme e pas disa muaj hetime kanë zhvilluar kontrolle në Prishtinë dhe Gjilan. Prokuroria njofton se për rastin RYDOX, ka bashkëpunuar me autoritetet e Shqipërisë, ku është vënë në pranga një person i dyshuar si bashkëpunëtor i dy të personave nga Kosova, të cilët dyshohen se kanë themeluar dhe udhëhequr tregun kriminal “RYDOX”. Sipas Policisë, tregu shërbente prej vitesh për të shitur dhe trafikuar produkte dhe shërbime të kundërligjshme, përfshirë të dhëna personale të viktimave, përfshirë emra, adresa, numra të sigurimit social, patent shoferi, e-mail adresa dhe fjalëkalime, dhe të dhëna të llogarive bankare për qasje online.