Kancelari gjerman Friedrich Merz, i cili po përballet me vështirësi, do të mbështetet te kryeministrja popullore e qendrës së majtë e landit të Meklenburg-Pomeranisë Perëndimore për të penguar të djathtën ekstreme në zgjedhjet e së dielës, të cilat mund të përcaktojnë mbijetesën e tij politike. Pas suksesit në zgjedhjet e 6 shtatorit në Saksoni-Anhalt, partia e ekstremit të djathtë "Alternativa për Gjermaninë", AfD, duket se ka gjasa të dalë sërish e para në zgjedhjet e landit të Meklenburg-Pomeranisë Perëndimore, të cilat mbahen në të njëjtën ditë me zgjedhjet në kryeqytetin Berlin. Fitorja e parë historike e AfD-së në zgjedhjet e një landi tronditi sistemin politik gjerman, i cili bazohet te konsensusi, duke theksuar mundësinë e një fitoreje të së djathtës ekstreme në ekonominë më të madhe të Evropës në zgjedhjet e ardhshme federale të planifikuara për vitin 2029. Sondazhet kombëtare aktualisht e renditin AfD-në në 27-29%, krahasuar me 18-20% për CDU-në. Në Meklenburg-Pomeraninë Perëndimore, shpresat e partive të tjera për ta mbajtur AfD-në larg pushtetit varen kryesisht nga popullariteti i kryeministres së landit, socialdemokrates 52-vjeçare Manuela Schëesig; ajo drejton një koalicion me Partinë e Majtë dhe gëzon një mbështetje personale prej mbi 60%. Sondazhi më i fundit i institutit INSA e renditi AfD-në në 37%, përpara SPD-së me 35%, ndërsa Partia e Majtë ishte në nivelin 10%. CDU-ja konservatore e Merz-it ishte në nivelin e ulët prej vetëm 7%. Nëse këto shifra konfirmohen të dielën, ato mund të mjaftojnë për një koalicion mes SPD-së, Partisë së Majtë dhe të Gjelbërve, megjithëse të Gjelbrit ndodhen pikërisht në pragun prej 5%.