Vdekjet nga i nxehti në Evropë mund të trefishohen deri në fund të shekullit, me shifrat që rriten në mënyrë disproporcionale në vendet e Evropës Jugore si Italia, Greqia dhe Spanja, ka zbuluar një studim. I ftohti vret më shumë njerëz sesa i nxehti në Evropë, dhe disa ekspertë kanë argumentuar se ndryshimi i klimës do të jetë në përfitim të shoqërisë duke reduktuar ato vdekje. Por studimi, i botuar në Lancet Public Health, zbuloi se numri i viktimave nga i nxehti do të rritet në mënyrë të frikshme ndërkohë që temperaturat po bëhen më të rrezikshme po ashtu. Nëse ngrohja globale do të sjellë një rritje katastrofike të temperaturave me 3 apo 4 gradë celcius, atëherë vdekjet nga nxehtësia do të tejkalojnë dukshëm viktimat e të ftohtit. Studiuesit thonë se rezultatet e hulumtimeve të tyre sugjerojnë se ndryshimi i klimës mund të paraqesë “sfida të paprecedenta” për sistemet e shëndetit publik, veçanërisht gjatë valëve të të nxehtit. “Shumë më shumë vdekje të lidhura me nxehtësinë priten të vijnë ndërsa klima ngrohet dhe popullsia plaket, ndërsa vdekjet nga i ftohti bien pak”, thotë David García-León nga Qendra e Përbashkët Kërkimore në Komisionin Evropian, bashkëautor i studimit. Viktimat e të nxehtit mund të shkojnë deri në 129 mijë në vit nëse temperaturat rriten me 3 gradë celcius më shumë se nivelet paraindustriale. Sot, vdekjet nga nxehtësia në Evropë janë 44,000. Por numri vjetor i vdekjeve nga i ftohti dhe i nxehti në Evropë mund të rritet nga 407,000 njerëz sot, në 450,000 në vitin 2100, edhe nëse liderët botërorë arrijnë objektivin e ngrohjes globale prej 1.5 gradë Celsius, zbulon studimi. Hulumtimi vjen pasi një serie valësh përvëluese të të nxehtit kanë bërë kërdinë në të gjithë kontinentin.