Rritja e kostos së prodhimit pas zhvlerësimit gradual të monedhës europiane dhe rritjes së pagës minimale, u bë shkak që një kompani italiane e prodhimit të veshjeve intime me bazë në Shkodër, të zhvendosë një pjesë në prodhimit në Uzbekistan. Ky reagim i kompanisë italiane, e cila operon në Shkodër që prej vitit 1996, konsiderohet nga eksportuesit si një sinjal i qartë i pasojave që po sjell në ekonominë shqiptare, zhvlerësimi i euros kundrejt lekut. “Ajo çfarë kishim paralajmëruar, tashmë po ndodh. Cottonella një firmë me një jetëgjatësi në Shkodër prej 27 vitesh, vendos të largohet . Platforma e kësaj firme furnizonte me punë në disa momente rreth 80% të gjitha rrobaqepsive në Shkodër. Arriti t’i mbijetojë vitit të mbrapshtë 97 ku ju desh ta mbronin punën me armë dhe arrin të ikë nga Shqipëria pikërisht tani. Shkaku kryesor është zhvlerësimi i monedhës Euro.”- thuhet në reagim. Kjo kompani punësonte 70 veta ku përfshihet administrata dhe prestaria, teksa në gjithë vendin shpërndante punë për gadi 3000 veta. Sindikatat dhe punonjësit e sektorëve eksportues kanë paralajmëruar protestë para kryeministrisë në ditët e para të muajit janar, pasi kërkojnë të merren masa për frenimin e zhvlerësimit të euros.