Pentagoni ka publikuar një paketë të re dokumentesh të deklasifikuara mbi fenomenet ajrore të paidentifikuara, të njohura si UAP (Unidentified Aerial Phenomena), të cilat shpesh referohen si UFO. Publikimi vjen pas urdhrit të dhënë më herët nga presidenti amerikan Donald Trump, duke hapur akses publik për mijëra video, fotografi dhe dokumente që më parë ishin të kufizuara për arsye sigurie. Sipas Departamentit të Mbrojtjes, materialet janë mbledhur nga disa agjenci federale dhe tashmë janë të aksesueshme për publikun përmes platformave zyrtare, pa nevojë për autorizim të veçantë sigurie.Autoritetet kanë bërë të ditur se procesi i deklasifikimit do të vijojë në mënyrë periodike, me publikime të reja çdo disa javë. Interesi publik për fenomenet e paidentifikuara është rritur ndjeshëm vitet e fundit, sidomos pas deklaratave të figurave të njohura politike dhe shkencore. Në këtë kontekst, edhe NASA ka mbështetur rritjen e transparencës dhe studimin shkencor të fenomeneve UAP, duke theksuar rëndësinë e kërkimit për të kuptuar më mirë hapësirën dhe fenomenet e saj. Sipas zyrtarëve amerikanë, deri më tani nuk ka prova publike që konfirmojnë kontakt me jetën jashtëtokësore, por materialet e reja synojnë të rrisin transparencën dhe të ndihmojnë kërkimin shkencor.