Administrata e presidentit amerikan Donald Trump, qartazi po tregon pak gatishmëri për të përfshirë Evropën në bisedimet e paqes me Rusinë. Kjo u bë e qartë në deklaratat e bëra nga përfaqësuesi i qeverisë amerikane për Ukrainën, Keith Kellogg. BBC-ja e citoi atë të thoshte: negociatat e mëparshme kanë dështuar, sepse në to kanë qenë të përfshira shumë palë. Por evropianët mund të japin kontributin e tyre, i cili sipas përfytyrimeve të administratës së presidentit Trump, duhet të konsistojë në dërgimin në Ukrainë të ushtarëve për një forcë paqeruajtëse ose për programe stërvitore pas përfundimit të luftës. Sekretari i Përgjithshëm i NATO-s, Mark Rutte tha gjatë Konferencës së Sigurisë në Mynih se ishte në dijeni se administrata amerikane kishte nisur një kërkesë në formë pyetësori për vendet anëtare të NATO-s për t'u informuar se me sa ushtarë dhe në çfarë forme mund të kontribuojnë për trupën paqeruajtëse në Ukrainë.