Pasi një barkë e mbushur me 400 emigrantë ishte në vështirësi në mes të detit, pa karburant, në një trajektore të rrezikshme emigracioni në mesdheun qendror, autoritetet italiane nisën një operacion të madh shpëtimi ndërkohë që më herët, malta kishte refuzuar të priste ata që ndodheshin në bord. Apelet e dëshpëruara të klandestinëve për ndihmë, mbetën të padëgjuara për thuajse një javë, para se ata më në fund të zbrisnin në brigjet italiane, të mërkurën, bashkë me 800 emigrantë të tjerë të bllokuar prej më shumë se 10 ditësh në një tjetër anije. Shumë nga emigrantët ranë për tokë sapo shkelën në breg, të dehidratuar dhe të mbuluar në të vjella nga deti i trazuar – thanë dëshmitarët. Vetëm pak prej tyre kishin veshur jelekë shpëtimi. OJQ-të që veprojnë në zonë, përfshirë organizatën gjermane Sea-Ëatch International, thanë se ato kishin lajmëruar në mënyrë të përsëritur autoritetet malteze për barkën, por ishin injoruar. Malta, është më e gatshme të ndërmarrë rrezikun që të lërë 400 persona të vdesin, se sa të kujdeset për ta – thotë organizata.