Bashkimi Evropian kërcënoi të fillojë një luftë tregtare me Donald Trump pasi presidenti amerikan u akuzua për "shantazh" për tarifat e tij për Groenlandën. Një burim diplomatik tha të dielën në mbrëmje se BE po përgatit 93 miliardë euro tarifa hakmarrëse kundër eksporteve amerikane në bllok. Trump njoftoi të shtunën se do të vendoste një tarifë prej 10% për eksportet nga Britania dhe vendet evropiane derisa të arrihej një marrëveshje që SHBA-të të blinin Groenlandën nga Danimarka. Në bisedimet emergjente mes të dërguarve të BE-së në Bruksel të dielën në mbrëmje, presidenti francez Emmanuel Macron, u kërkoi shteteve anëtare të aktivizonin "bazukën tregtare" të bllokut për të kufizuar aksesin e firmave amerikane në tregun e vetëm në përgjigje të kërcënimeve. Të dielën, Keir Starmer i tha Trump se ai nuk duhet ta ndëshkojë Britaninë për kundërshtimin e përpjekjes së tij për të blerë Groenlandën dhe se vendosja e tarifave ndaj vendeve evropiane për "ndjekjen e sigurisë kolektive të aleatëve të NATO-s është e gabuar". Udhëheqësit evropianë pritet të takohen me Trumpin në Forumin Ekonomik Botëror në Davos këtë javë. Kryeministrja italiane, Giorgia Meloni, njëkohësisht aleate e trumpit, tha se tarifat ishin një gabim ndërsa Mette Frederiksen, kryeministrja e Danimarkës, akuzoi Shtëpinë e Bardhë për "shantazh".