Verës po i vjen fundi, megjithëse valët e nxehtësisë që na kanë shoqëruar gjatë gjithë këtij sezoni do ta shtyjnë ardhjen e dimrit me disa javë. Si çdo vit, ndërsa afrohen muajt më të ftohtë, Evropa duhet të mbështetet në rezervat e saj të gazit për të përballuar të ftohtin. Kjo nuk është më një tabu; ka ndodhur pas shpërthimit të luftës në Ukrainë, kur evropa u nda nga gazi rus, por mbyllja e ngushticës së Hormuzit tani, rrezikon ta ndërlikojë më shumë situatën. Midis faturave në rritje dhe kapacitetit të magazinimit në rënie të vazhdueshme, kontinenti i vjetër rrezikon të jetë i papërgatitur. Sipas britanikes Guardian, Evropa po shkon drejt muajve më të ftohtë me rezervat e gazit në nivelet e tyre më të ulëta në 13 vjet, duke nxitur atë që disa analistë po e quajnë një "panik dimëror" në rritje në tregjet e energjisë. Në javën e fundit të gushtit, objektet e magazinimit të gazit në Bashkimin Evropian ishin 63% të mbushura, shumë më poshtë mesatares prej rreth 80% të regjistruar në të njëjtën periudhë në vitet e fundit dhe ndër nivelet më të ulëta të parë ndonjëherë në një fund vere. Sipas të dhënave Gjermania renditet e fundit, me magazinim pak mbi 51%, ndërsa Polonia kryeson me 90.63%. Mbretëria e Bashkuar, një nga konsumatorët më të mëdhenj të gazit në Evropë, por me kapacitet relativisht të kufizuar të magazinimit vendas, mund të jetë veçanërisht e ekspozuar dhe vendi "nuk ka pothuajse asnjë rezervë gazi" përpara dimrit.