Evropa është në shënjestër të kërcënimeve nga terrorizmi dhe ekstremizmi i dhunshëm. Radio Evropa e Lirë shkruan se ka parë një raport të BE që paraqet kërcënim të madh duke përmendur rreziqet e rritura nga Afganistani dhe Irani, por edhe efektet negative që dalin nga lufta në Ukrainë. Niveli i kërcënimit në BE, sipas vlerësimit, “mbetet i lartë”, me “terrorizmin islamist/xhihadist” që vazhdon të jetë shqetësimi më i madh. Qëndrim që e ka mbajtur pak kohë më parë edhe EUROPOL-i që në mars e përshkroi kërcënimin nga terrorizmi si “akut”. Dokumenti prej 23-faqesh – që është përgatitur nga Këshilli i BE-së, i cili përfaqëson qeveritë e 27 vendeve anëtare të bllokut – kryesisht mbulon zhvillimet dhe trendët nga viti 2025, në vend se kërcënimet që janë të lidhura me luftën aktuale në Iran. Pavarësisht kësaj, vlerësimi, shkruan Radio Evropa e Lirë, prapë se prapë paralajmëron se “përshkallëzimi” në Iran ka rritur “shqetësime shtesë, sikurse mundësia e aktivizimit të rrjetit të bashkëpunëtorëve apo celulave të fjetura për të kryer sulme hakmarrëse terroriste brenda Evropës”, veçmas në shtete “me popullsi të madhe apo të konsiderueshme hebraike dhe komunitete myslimane”.