Ndërsa disa vende të Evropës po përballen me temperatura të larta dhe zjarre, Turqia po përjeton reshje të dendura shiu. Stuhia ka shkaktuar përmbytje të shumta në Ankara, ku rrugët dhe nënkalimet janë mbuluar nga uji. Disa automjete kanë mbetur të bllokuara, ndërsa qarkullimi është paralizuar në disa zona të kryeqytetit turk. Situata më problematike është regjistruar në Mamak. Në rrugën “Imam Alim Sultan”, një pjesë e asfaltit është shembur si pasojë e sasisë së madhe të ujit, duke krijuar një krater të madh. Një automjet i lehtë ka rënë brenda pjesës së shembur të rrugës dhe në shumë zona janë shkaktuar dëme serioze nga reshjet e dendura. Autoritetet dhe ekipet e emergjencës kanë ndërhyrë për largimin e ujit, hapjen e rrugëve dhe rikthimin e qarkullimit. Reshjet intensive kanë sjellë probleme edhe në zona të tjera të Ankarasë, duke përmbytur rrugë dhe biznese.