Në vendet anëtare të Bashkimit Europian në Europën Qëndrore dhe Lindore kërkesa për fuqi punëtore është rritur ndjeshëm, gjë që pritet të shtrijë efektet edhe në Shqipëri gjatë viteve të ardhshme duke përforcuar valën e emigracionit. Në studimin e kryer nga Insituti i Vienës për Studime Ekonomike Ndërkombëtare, bie në sy se kërkesa për punonjës, së bashku me nivelin e pagave është rritur ndjeshëm në vendet e unionit europian, sidomos pas krizës së Covid 19. Pritet që këto vende të thithin forcën punëtore të vendeve më një standard më të ulët pagesash, mes të cilave edhe Shqipëria. Çekia, Hungaria, Sllovenia dhe Sllovakia dhe së fundmi Polonia janë bërë pranues neto të emigrantëve, ndërsa në Bullgari emigracioni kompenson kryesisht vendasit që shkojnë jashtë. Niveli i vendeve të lira të punës për vitin 2021 u rrit ndjeshëm, ku 48% e firmave në industrinë hungareze raportojnë mungesa në fuqinë punëtore. Sektorit të kujdesit shëndetësor i është kushtuar një rëndësi e veçantë pas pandemisë së koronavirusit, moment që tregoi sesa i cënueshëm është ky sektor përballë sfidave të mëdha të shëndetit publik. Rekrutimi i punëtorëve nga jashtë vendit, qoftë edhe nga vendet e treta konsiderohet polika dominuese e një pjese të mirë të vendeve europiane, dhe për këtë po rregullohet kuadri ligjor për lehtësimin e regjimit të lejeve të punës për të huajt.