Ministrat e Brendshëm të Bashkimit Europian u mblodhën të martën për të diskutuar mbi pasojat e luftës në Lindjen e Mesme për gjendjen e sigurisë në Europë. Komisionerja e BE për çështjet e Brendshme, Ylva Johannson ka paralajmëruar për rrezikun e atentateve në Europë në periudhën e festave: "Ka një rrezik të lartë të atentateve terroriste", tha ajo në Bruksel në kuadër të takimit të ministrave të Brendshëm. Johansson e justifikoi këtë rrezik me "polarizimin" e madh që ka shkaktuar lufta mes Izraelit dhe organizatës terroriste të Hamasit. Ajo tha se do të akordohen 30 milionë euro shtesë për mbrojtjen e vendeve të caktuara si kishat, sinagogat dhe xhamitë. Më herët, edhe ministrja e brendshme gjermane dhe Autoriteti i Mbrojtjes Kushtetuese në Gjermani paralajmëruan nga rreziku i atentateve. Vetëm në fundjavën e kaluar një islamist vrau një turist gjermano-filipinas në Paris. Atentatori e justifikoi aktin e tij me dhunën kundër palestinezëve në Rripin e Gazës. Ndër të tjera ministrat e Brendshëm të BE zhvillojnë konsultime edhe për temën e migracionit dhe politikën e përbashkët të azilit. Të mërkurën ndërmjetësuesit e vendeve anëtare dhe të Parlamentit Europian duan të arrijnë një marrëveshje në çështjen e azilit, një nga përplasjet më të ashpra në BE prej vitesh. Ndër të tjera planifikohen procedura të përshpejtuara azili në kufijtë e jashtëm të BE.