Hetimi tatimor ka zbarkuar të martën në zyrat e agjencive më të mëdha të shit-blerjes së pronave të patundshme në Tiranë dhe sipas njoftimit të shpërndarë prej këtij institucioni, janë sekuestruar disa kompjutera dhe materiale të tjera që provojnë evazionin fiskal në sektorin e ndërtimit. Tatimet njoftojnë se kontrollet janë ushtruar në nëntë subjekte. Qëllimi është verifikimi i deklarimit të pagave reale të punonjësve, regjistrimin e tyre në organin tatimor, realizimin e shitjeve, lëshimin e faturave të fiskalizuara, si dhe kryerjen e verifikimeve të tjera të nevojshme gjatë procesit të kontrollit. Kontrollet, thonë Tatimet, gjetën shkelje të rënda me punonjës të padeklaruar, dokumentacion jotatimor, mungesë transparence në çmime dhe mosrespektim të detyrimeve ligjore për faturimin dhe fiskalizimin e shitjeve.