Të alarmuara nga shpenzimet e mëdha ushtarake të Rusisë që nga pushtimi i Ukrainës në vitin 2022, tre shtetet baltike po hartojnë plane emergjence për t'u përgatitur për mundësinë e qindra mijëra njerëzve që duhet të evakuohen në rastë të një grumbullimi trupash ruse ose sulm. Estonia, Letonia dhe Lituania kanë shprehur prej kohësh frikën për agresionin e mundshëm rus, duke përmendur sulmet kibernetike ruse, fushatat e dezinformimit dhe inkursionet gjatë muajve të fundit nga avionët luftarakë dhe dronët rusë. Rusia thotë se nuk ka plane për të sulmuar NATO-n. Por tre vendet, të cilat u aneksuan nga Moska gjatë Luftës së Dytë Botërore, kanë dyfishuar shpenzimet e mbrojtjes. "Kërcënimet mund të ndryshojnë", thotë Renatas Pozela, e cila si kreu i shërbimit të zjarrfikësve të Lituanisë është e përfshirë në planifikimin e emergjencës që është rritur që kur tre vendet ranë dakord të bashkëpunojnë për mbrojtjen civile në maj. Detajet e numrit të të evakuuarve të mundshëm për të cilët po përgatiten zyrtarët, janë raportuar për herë të parë. "Është e mundur që të shohim një ushtri të fuqishme përgjatë kufijve të vendeve baltike, me qëllimin e dukshëm për të pushtuar të tre vendet brenda tre ditësh deri në një javë", thotë Pozela. Sabotimi i lidhjeve të komunikimit ose transportit, një fluks masiv emigrantësh, trazira civile mes pakicave rusishtfolëse ose lajme të rreme që shkaktojnë arratisje masive janë skenarë të tjerë të diskutuar në mediat lokale dhe më gjerë. "Ne flasim për këtë çdo muaj, çdo javë, në punë dhe kudo", thitë Arminas Raudys, 31 vjeç, një vullnetar që luan rolin e një të evakuuari në një stërvitje në Lituani këtë javë.